№213 жалпы орта мектеп кітапханасы жайлы мәлімет

ХХІ – ғасыр – руханият, мәдениет, ақпарат ғасыры. Қай қоғамның болса да тұрақты дамуында мәдениеттің алатын орны зор екенін айтар болсақ, біздің рухани- мәдени тынысымыздың өзекті мәселелерінің бірі – мектеп кітапханалары. Мектеп кітапханасында оқушыларды оқулықтармен қатар, көптеген көркем әдебиеттерімен, дыбысты ертегілермен, аудиодискілермен, ұстаздарға арналған пәндер бойынша көрнекіліктермен қамтамасыз етіп отыр. Қазіргі ақпарат пен ғылым дамыған заманда оқушылардың өскелең талабын қанағаттандыруға, рухани байлығын, жалпы қабілетін дамытуға кітапхананың берер пайдасы көп, кітапхана – ғылым мен мәдениеттің өмірлік іс-тәжірибелердің жинақталған ордасы, жаңашылдықпен шығармашылыққа баулитын, әрі оларды көпшілікке тарату мен насихаттауға бағытталған басты құралдардың бірі.
Рухани тарихты ата-бабаларымыздың салт-дәстүрін әдет-ғұрпын тануда кітаптың берер көмегі ұшан-теңіз. Ұстаздардың ұстазы А.Құнанбаев атамыз : «Кітап – ғасырдан ғасырға сапар шеккен ақыл ескерткіші» деп айтқандай, бар білімнің қайнар көзі кітапта екенін нақтылап айтқан.
Елбасымыз Н.Ә.Назарбаев өзінің халыққа жолдауында «Қазақстан бәсекеге қабілетті 50 елдің қатарынан лайықты орын алу үшін өзінің мәдениеті мен ғылымын, білімі мен білігін, рухани байлығы мен елімізді айдай әлемге таныта білуі керек. ХХІ ғасыр білімнің, ғылымның, жаңа технологияның ғасыры. Бар білімнің қайнар көзі - кітапхана» деген еді. Жас ұрпақты тәрбиелеуде кітапхананың орны ерекше. Бүгінгі шәкірттер – ертеңгі ел тірегі. Жас ұрпақ тәрбиесіне кітапхана мен кітаптың атқаратын қызметі зор. Кітап – замандардың заманына өтіп, өзінің қымбат қазынасын ұрпақтан ұрпаққа жеткізіп келе жатқан рухани азығы. Кітапхананың басты мақсаты кітапханаға оқырмандарды көптеп тарту. Кітап сөрелеріндегі кітапты оқырман қолына жеткізу, насихаттау, жаңашылдыққа бағыттау.
№213 жалпы орта мектеп кітапханасының қорында жалпы 15903 дана, олардың 12310 данасы оқулық болса, 277 дана әдістемелік, 4059 дана қазақ-орыс тілдеріндегі көркем әдебиеттер, жазу дәптерлері, 67 дана электронды оқулықтар бар.
Мектеп кітапханасының қорын «Acces» бағдарламасымен электронды базасын жасап отырамыз, яғни әдеби кітаптарды іздеп табу оңай болуы үшін.
Кітапты оқырмандарға насихаттау мақсатында «Кітап – рухан қазына» атты 5-сынып оқушылары арасында ертеңгілік, «Үлгілі оқушылардың оқулықтары» атты кітап көрмесі ұйымдастырылды. «Кітап.Компьютер.Ақпарат» атты диспут өткізілді. Мектеп кітапханасында сонымен қатар «Тілім менің ғасырларлан аманат», «Ұстазым, ұлағатым, мақтанышым», «Желтоқсанның мұзда жанған алауы» , «Елбасы – елдің тірегі», «Сенің сүйікті кітабың» атты кітап көрмелері жыл бойында ауысып отырады. Бұл көрмелердің жаңашылдығы виртуалды көрме түрінде кітапханада жасылынып насихатталады. Виртуалды түрде жасалынатын себебі, кітапханамызда әдеби кітаптар қоры аз. Болашақта мектеп кітапханалары тек оқулықтармен толықтырылып қоймай, әдеби кітаптардың қоры молаяды деген сенімдемін.
«Сырдария кітапханасы» сериясымен жарық көрген көптомдығының 200 данасы кітапхана қорында бар. Оқушылардың шығармашылық қабілеттерін дамыту мақсатында А.Сопыбековтың «Дөңгеленген дүние» атты кітабын негізге ала отырып, жерлес ақынымызбен кездесу кешін өткізген болатынбыз. Сонымен қатар, ақын-жазушылардың шығармаларын насихаттау мақсатында «Мұқағали мұрасы - мәңгілік», «Абай- дана, Абай – дара қазақта», «Махамбет – жыр семсері» атты мәнерлеп оқу сайыстарын өткізіп келеміз. Бастауыш сынып оқушылары арасында «Менің сүйікті ертегім» атты танымдық сабақтар, «Кітап – қашан пайда болды?» библиографиялық сабақтар, «Мен оқырманмын» атты сайыс өткізілді.
Оқушыларды сауаттылыққа бағыттауда «100 кітап жобасы» бойынша мектеп оқушыларына арнап қазақ әдебиеті мен орыс әдебиетінен шығармаларды іріктеп алған болатынбыз. Сол шығармаларды оқушыларға жан-жақты оқытуға тырысуымыз қажет. Қазақтың атақты ақын – жазушыларының кітаптары кітапхана қорында бар болғандықтан Ы.Алтынсаринның «Кел, балалар, оқылық» кітабындағы шығармаларды 5 сынып оқушылары сурет салу арқылы жеткізе білді.
«123» әдісі бойынша 1 айда 20 минут бойы кітапты оқып, сол түсінігін 3 минут ішінде эссе түрінде қағаз бетіне түсірулері қажет. Бұл әдіске көбінесе көркем әдебиеттерді таңдап 8-11 сынып оқушыларын баулудамыз. Негізінен барлық тапсырмалар балалардың шығармашылық қабілетін, дағдыларын дамытуға, сыни ойлауға, қажет ақпаратты іздеп, оны талдауға бағытталған.
Оқушылар кітапханамен байланыса отырып, көп жаңашылдыққа көз жеткізді. Бір айта кетерлік жағдай, 14-19 қараша аралығында мектебімізде «Мектебіңе кітап сыйла» атты акция өткізілді. Мектеп оқушыларының кітапханамен тығыз байланыстылығы, ауыл азаматтарының жанашырлығы арқасында 100-ге тарта кітаптар жинақталды. Ауылымыздың туып өскен азаматы Исмайлов Жақсыбай мырза бұғының терісінен жасалынған бағалы кітапты, оған қоса 1905 жылғы жасалынған теміржолдың сызбасын тапсырды. Бұл біз үшін өте құнды құжат болып есептеледі.
Абай атамыздың 175 жылдығына орай сыныптар арасында марафон ұйымдастырылып, оқушылар |Абай атамыздың өлеңдерін, қара сөздерін мәнермен жатқа айта білді. Ұлы ойшыл Әбу насыр әл-Фарабидің 1150 жылдығына орай кітап көрмесі ұйымдастырылып, өмір жолымен таныстырылды.